បាត់ដំបង៖ ក្រោយពីសម្តេចតេជោ ហ៊ុន សែន បានណែនាំនិងទុកពេលឲ្យចំនួន ២សប្តាហ៍រឿងព្រំប្រទល់មិនច្បាស់លាស់រវាងខេត្តប៉ៃលិននិងខេត្តបាត់ដំបងឥឡូវថ្នាក់ខេត្តបានបញ្ចប់ដោយយល់ព្រមទាំងគ្រប់ភាគី។

ជាក់ស្តែងកាលពីថ្ងៃទី១៩ ខែតុលា អភិបាលខេត្តប៉ៃលិន លោកស្រី បាន ស្រីមុំ និងក្រុមការងារអញ្ជើញដឹកនាំមន្ត្រីជំនាញចូលរួមក្នុងកិច្ចប្រជុំពិភាក្សាស្តីពីសំណើសុំកែសម្រួលព្រំប្រទល់រដ្ឋបាលរវាងខេត្តប៉ៃលិន និងខេត្តបាត់ដំបង ក្រោមអធិបតីភាពរដ្ឋលេខាធិការប្រចាំការ ក្រសួងមហាផ្ទៃ លោក សក់ សេដ្ឋា ដោយមានការអញ្ជើញចូលរួមពី ឯកឧត្តម លោកជំទាវ ប្រធានក្រុមប្រឹក្សា និងអភិបាល នៃគណៈអភិបាលខេត្តបាត់ដំបង និងខេត្តប៉ៃលិន ប្រធានមន្ទីរជំនាញ និងរដ្ឋបាលឃុំពាក់ព័ន្ធ ព្រមទាំងក្រុមការងារនៃនាយកដ្ឋានកិច្ចការរដ្ឋបាលរាជធានី ខណ្ឌ និងខេត្ត។

ក្នុងកិច្ចប្រជុំនេះគឺកំណត់យ៉ាងច្បាស់លាស់រវាងព្រំប្រទល់ខេត្តទាំងពិរមិនឲ្យស្រពិចស្រពិលដូចមុនទៀតឡើយគឺដើម្បីបំរើដល់ផលប្រយោជន៍ប្រជាពលរដ្ឋកុំឥ្យមានការលំបាកដូចមុនទៀត។

បើតាមការគូសបញ្ជាក់ពីមន្រ្តីជំនាញ បានឲ្យដឹងថា៖ ផ្ទៃដីដែលត្រូវកែសម្រួលផ្ទៀងផ្ទាត់កាត់ដម្រឹមព្រំប្រទល់រដ្ឋបាលជាក់លាក់ជាថ្មីឡើងវិញ រវាង ខេត្តបាត់ដំបង និងខេត្តប៉ៃលិន ក្នុងនោះយ៉ាងហោចណាស់ផ្ទៃដីប្រមាណជាង ១ម៉ឺនហិកតា ដែលស្ថិតនៅក្នុងភូមិសាស្ត្ររដ្ឋបាលខេត្តបាត់ដំបង ត្រូវផ្ទេរប្រគល់ទៅខាងរដ្ឋបាលខេត្តប៉ៃលិន កាន់កាប់វិញចំនួន៣ទីតាំងនិង៣ស្រុក ក្រោយពីចុះហត្ថលេខាទទួលស្គាល់ព្រំប្រទល់កែសម្រួលរួចហើយនោះ៕